قآل أبوسك .. قلت : تعقل و إلآ أحوسك ..!؟

يُمه ... هَيّن ...!!

الهوى بعيون بنتك صار بيّن ...

ما يبي له من يعَلم ...!!

و صاحبي بالعشق أُستاذ و مُعَلِم

كيف اخبي ...؟! إنتي من جِدك يا يُمه ...؟!

***
و قلبي وردي ... و صغَـيّر ... و لَيّن

ايه احبه ...!!

يعني هذا اللي تبينه ...؟!

كيف اخبي و هذا دربي ...؟! و الهوى مكتوب من ربك و ربي

***
يوم شفته

متكشخ ... و متعطر ... و متزين

طاح كاسي

فدوته راسي ... و ناسي

مو بكيفي ...!!

يُمه جنني بـ حنانه

ما يخون

الهوى عنده امانه

وريحة انفاسه دخون

***

مو طبيعي هالولد من جد يُمه

فيه ذوق ... و فيه شوق ... و فيه للعشاق عوق

يُمه يسلم لك حبيبك

و الله نَسَاني حليبك

أيه و رب الكون يُمه

***
يُمه لو تدرين عنه ...

قلتي لي فالك حبيبك

ايه احبه

ايه يمه

ايه اموت برعشة شفاته و اذا يسمح لي الَّـمّه

***

سامحيني لو حلفت إني لَـ " لِـمّه "

مو بكيفي

و ضحكته خمري ... و كيفي

مو طبيعي

هالولد عمري و ربيعي

و فوق هذا صار شاعر ...

***

كله يتغزل بخصري ... و ريحة انفاسي و عطري ...

و العرق لا سال قطرة فوق قطرة و طاح من جيدي الى مركوز صدري

قال احبه هذا مِسكك مو عرق يا نور عيني

قلت ادري

قال يا حلوه غرورك ...

و شمس وجهك تكسرعيوني بنورك

قلت كافي

قال شورك

***

و الله فعلاً مو طبيعي
إن عشق كله جنون

و إن حكى كله فنون ...

على راسي ما يهون

إيه يُمه

إيه احبه

و اعصر ضلوعه و اضمه

و انتشي من ريحة انفاسه ... " و اذا يسمح اشمه"

***
خلى لعيوني كثير من البنات ... على شاني

خلى نورة و خلى لمياء و خلى خولة

ايه يُمه

و خلى اسماء بنت خاله ...

و خلى سارة بنت عمه

اللي ابوها اخو ابوه ... و دمها هو نفس دمه

باعهم لعيون بنتك ... و اشتراني ...

شفتي يُمه ...؟! و آنا اراه إنه غرامي ... و هو بعد مثلي يراني ...

***

إلا احبه

إلا احبه

إلا احبه
و اللي ما يسمعني يسمع ... إلا احبه

و اعشق ترابه اذا داسه برجله

قال لي مَرة اناظر ...

قلت حاضر

يا الله ناظر

يوم ناظرني بكيت

ما تحملت الهوى بعيونه السوداء

و شكيت

***
قال :ابوسك ...؟!

قلت :تعقل ... و إلا احوسك ...؟!

قال :انا اقصد على السنة

قلت: ليت

قال :و الله لآخذك قدام اخوك ...

بعد ما تربط يديني في يدينك بأمر ابوك

قلت : تبطي ...؟!

قال : لا لا

قلت : لو ابطيت جيتك

***

قال يسلم لي وفاك ...

قلبي قلبك ... و بيتي بيتك ...

لعن ابو من خان عشقك

و ما حفظ عهده معاك ... و ما رعاك ...

و ما تذرى ظلال خصرك وقت صيف

و ما دفن نفسه بحضنك و خذ دفاك

***

و إن خطبني لا تردونه يا يُمه ...

آنا ابيه

قولي ( تم )

لا تخلين العُمر يمشي الم .. ها يا يُمه ...؟!

قولي ( تم ) ..